風暴潮湧似汪洋

    買樓贈送橡皮艇

    強颱逼爆玻璃窗

    神仙難救住戶傷

    澳門塞車見得多，陸上行舟冇幾何。上周颱風犯境引發風暴潮，內港一帶成澤國，消防出動橡皮艇救人，幾誇張。

    住內港朋友，由細浸到大，“麵王”浸到銅皮鐵骨，水過心口，照樣潛浮，從未驚過，唔似其他區份大小朋友未見過大蛇屙尿，驚到騰騰震。

    老一輩話，內港一浸幾十年，唔理十年、百年一遇，總之打風有得浸，冇得瞓。無論上幾代管治者抑或前朝，似乎從未諗過點治水患，事關唔知大禹係乜誰。今時今日，官爺也有諗過治水，然有心無力，人定勝天講就得，咁棘手問題，都係留番下一代解決，或當處身荷蘭、威尼斯，水鄕情懷或會成為馬交風景線。

    鎭哥乃漁家子弟，細時綁住葫蘆，出海久歷風浪。近年燃油貴，家族出海成本重，漁獲少，疊埋心水上岸轉行，對於內港水浸，對比遠洋作業風高浪急，眞箇濕濕碎。那日鎭哥當夜更，半夜落班時，河邊新街又水浸，架車唔係水陸兩用，變成有家歸不得，縱有浪裡白條身手，也得打退堂鼓，幾乎要租酒店。

    內港近十六浦一帶多舊樓，河邊新街則有高層、超高樓，有佻皮住客話，水浸無改善，地產商賣剩樓想促銷，不妨出招買樓送橡皮艇，效法買車送油券，幾新鮮。

    有超高樓朋友打風食正，當日致電羅倫斯，佢話間屋搖搖下，頭暈暈，似坐遊樂場海盜船，枕住成粒鐘，唔驚有鬼。北區超高樓仲弊，颱風勁到逼爆廿戶玻璃窗，有住戶起雙飛，唔知救得房或廳，半夜三更，神仙難救。

    強颱爆窗，響起警示，令高層大廈住戶起戒心。現時澳門高廈衆多，都跟潮流設計，有些大廳或窗戶均設大幅觀景窗，全屬封死，若強颱吹正，分分鐘重蹈爆窗覆轍。此次意外，究竟玻璃化學，有無次貨，抑或所謂群樓風洞效應，當局亦宜探個究竟，如果發現玻璃唔合格，則整個驗樓機制有必要檢討。

    現時很多高層舊樓住戶或購舊樓人士，裝修換電線水喉，也會換窗，只知用幾分厚玻璃，而不知屬鋼化抑劣質，能否抗風天曉得，住戶只能自求多福。

    羅倫斯