正牌夜鬼睇打波 體力尤勝冒牌貨

    意西爭標講狀態 贏波有利還歐債

    車友做慣夜鬼，惟近排變熊貓眼，皆因睇波到天明。

    歐國盃連場大戰，凌晨兩點半開波，撞啱葡國隊打入四強，車友情意結，成葡軍擁躉，點都要打氣。現時日長夜短，五點半天光，加時射十二碼，睇完波，已見周街“老友記”上松山晨運矣。

    “車神”大鋪癮，上半場坐梳化睇，下半場由坐變瞓低，睇睇吓搵周公，場波打完始醒，未知鹿死誰手。“麵王”你精我唔呆，一早元龍高臥，諗住養精蓄銳，到時起身睇打波，孰料瞓過廟，醒時場波已打一大半。

    所以話，夜鬼也有分正牌，上慣夜班之人，此一鐘數肯定鬼打冇咁精神，乃長年“歷練”得來者，那管是否隱藏“亞健康”。中途出家夜鬼，未必頂順，叫佢轉做夜班或輪更，做一段時間，便會失眠或神經衰弱，甚至影響心肝脾肺腎。有賭場中人話，見到不少莊荷冇客時瞌眼瞓，好似樁米牛，又似雞啄米，雖是後生仔，亦唔捱得夜。

    今屆歐國盃列強實力，只有四強似樣，其餘乏善可陳。個人近年愛看西班牙、德國隊，鬥牛勇士非靠蠻力，乃技術型球隊，短傳滲入無懈可擊，無前鋒打法似幾創新。實際上，西班牙打法成支巴塞餠印，磋波一流，不過巴塞多了個技術精湛射手美斯，實力有過之而無不及。西班牙只靠一班小矮人落磨，控球在腳打法已被摸熟，只要對手緊迫，一樣打得辛苦。

    德國歷來講實效，行軍迅速，不重花巧，硬橋硬馬，擅長高空轟炸，憑此打法，無論世界盃或歐國盃，都有上佳表現，可惜打慣順景變過份自信，顧攻忘守，慘被意大利反擊得手。

    葡萄牙今屆有進步，後防頗穩，中場不差，前鋒則靠C朗單天保至尊。四強被西班牙淘汰，有點可惜，射十二碼時球員搞錯次序，緊張過度，種下射失伏線。

    意大利有驚喜，以往鐵桶陣，打悶波，睇意甲亦慢呑呑，悶死人，今屆則進取，攻勢足球堪欣賞。此文見報時，歐國盃名花有主，或許意大利保持狀態，已成新霸主，但無論哪隊贏，孭債陰霾都會一掃空。

    羅倫斯